UK-in hri leng vanga khuahkhirhna siamte a hlip

Britain sorkar chuan Covid vaccine booster an pek chhuah chuan hna a thawh ṭhat avang leh, hri kai zingah harsatna lian tham nei leh, damdawi-in panpui ngai an tlakhniam avangin hri leng laka invenna tur, khuahkhirhna a siam tam zawk chu nimin aṭang khan a hlip.

Nimin aṭang khan England khawi hmunah pawh hmai tuamna hman kher a ngai tawh lo a, nightclub leh punkhawmna hmun dang luhna atana Covid pass ngai ṭhinpawh tihtawp a ni ta bawk.

Sorkar chuan kar liamta khan mahni in aṭanga hna thawk tura mipuite thurawn a lo pek te leh, classroom chhunga hmai tuamna hmang vek tura a lo titawh pawh a sut leh tawh a ni.

Inkaihhruaina khauh zawk "Plan B"-tiha an sawi hi nikum December thla tir lam khan hri darh chak tak Omicron variant avangin hman a ni. Hei hi heatlh service lam indaih lohna thleng tur venna atan leh, mipuiten booster dose an lak theihna tura hun pekna atan a ruahman an ni.

Health Secretary Sajid Javid chuan sorkarin vaccine sem­chhuah run pui, testing leh antiviral treatment a siamte chuan an ram chu Europe ram zinga venhimna nei ṭha berah a siam theih phah a, nunphung pangngai an zawm leh theihna tura siamtu a ni, a ti.

Hemi rual hian Javid chuan, "Covid nena khawsak kan zir chhung hian, hri hian min kiansan mai dawn lo tih kan hriat ve reng a pawimawh a ni," a ti. Hri kai tlahniam zel karah health official-te chuan Omicron chu ramchhung hmun tam zawkah a la darh mek thu leh, a bikin naupang leh kum upa lamte chu fimkhur turin an chah.

Official-te chuan naupang kum 12 chunglam zinga 84% dawnin vaccine dose hnihna an lak tawh thu leh, kum bithliah la thei chin zinga 81%-in booster dose an la tawh bawk tih an sawi. Hospital admission leh intensive care unit-a dahluh zat chu an pun belh lo emaw an tlahniam lam emaw a ni bawk.

Kumthar ni bawr vela nikhata hri kai hmuh chhuah mi 2,00,000 vel ni ṭhin chu tunhnai khan nikhatah mi 1,00,000 bawr velah a tlahniam tawh a ni.

Prime Minister Boris Johnson chuan kar hmasa khan ram puma Omicron leng chuan a peak a thleng tawh tih a sawi. Sorkarin inthlahdul lam an pan zel karah hian dawr ṭhenkhat leh public transport ope­rator-te chuan mipuite chu hmai tuamna vuah chhunzawm zel turin an ngen thung. London Mayor Sadiq Khan chuan khawpui chhunga bus leh subway train-ah te chuan hmai tuamna hman chhunzawn a nih tur thu a sawi bawk.

Hri kai te chu ni nga chhung an inkhung hran chhunzawm a ngai dawn a, mahse PM Johnson chuan he inkaihhruaina pawh hi tihtawp thuai a nih tur thu sawiin, hri kaite chu fimkhur leh uluk taka inenkawl turin a chah. Health official-te chuan Covid-19 chu tlang hri leng anga ngai tawh tur leh, hun lo kal zel tura hmachhawn dan ṭha zawk siam turin ngaihtuahna an seng mek tih an sawi.

Scotland, Wales leh Northern Ireland-te pawhin hri vanga khuahkhirhna an siam chu an thlahdul tawh a ni.