Japan-ah pig cholera leng vangin ranvulh suat

Japan ramah kum 25 chuang hnua a ṭum khatnan pig cholera a leng a, hei vang hian vawk vulh lai 600 chuang suat an nih tawh bakah, vawksa thawnchhuah pawh tihtawp rih a ni.

Central Japan-a vawk vulhna farm-ah kar kalta khan he hrileng vang hian vawk 80 an thi a ni. Vawk thite hi a sample lain enfiah an ni a, Pathianni khan test nawn lehin pig cholera , swine fever vang a ni tih finfiah a ni ta a ni. Hei vang hian he farm-a vawk vulh dang la awm 610 te chu an suat nghal bawk.

Sorkar chuan pig cholera hri hi hmun dangah a darh leh darh lo enfiah turin specialist team a din nghal.

Vawk natna hri a leng tih finfiah a nih velah sorkar chuan rampawn lama vawksa thawnchhuah ṭhin pawh a titawp nghal. Japan hian nikum chhung khan ram pawn lamah vawksa hi US dollar maktaduai 9 man zet a thawnchhuak a ni.

Japan rama pig cholera len hnuhnun ber chu kum 1992 kha a ni. He natna hian mihringah nghawng a nei lo nia sawi a ni.