Cambodia eptu hruaitu Kem Sokha bail-in chhuah tir

Ram phatsantua puha man, Cambodia eptu hruaitu Kem Sokha chu Pathianni khan bail-a chhuah tir a ni a, a thubuai hi tihtawp sak a nih dawn leh dawn loh erawh sawichian a la ni lo.

Kem Sokha hi kum 2017 khan man a ni a, man anih chungchangah politics a inrawlh nia sawi a ni.

Sokha man a nih hnu hian a party, Cambodia National Rescue Party chu ṭhiahsak a ni zui a, hei vang hian kumina inthlanpui neihah khan eptu party mumal awm loh vangin rorellai party, Cambodian People's Party (CPP) chuan chiang takin hnehna a chang zui a ni. July thlaa inthlanpui neihah hian CPP hian seat zawng zawng a la a ni. Eptu party-te beih an nih danah han ram hrang hrangten Cambodia sorkar an demna thu pawh an lo sawi tawh a, Cambodia ram tana chhawmdawlna pek ṭhinte pawh tihtawpah an vau hial a ni.

Kem Sokha hi US nen inthuruala Cambodia sorkar paihthlak tuma phiarruah puh a ni. He thubuaiah hian thiam loh chantir a nih chuan kum 30 thleng lung-in tantir theih a ni ang.

Human Rights Watch chuan Cambodia sorkar hnenah Kem Sokha laka thubuai siamsak hi thudelhkilh awm loa titawp nghal tur leh, an party an ṭhiatsakna pawh sut leh turin a phut.