Sudan President-in sorkar ṭhiat

Sudan President Omar Hassan al-Bashir chuan Pathianni khan an ram sorkar chu ṭhiatin, Prime Minister thar tur a ruat nghal.

Sudan ram hian sum lamah harsatna a tawk chho reng a, tunhnaiah thil man pawh a sang chak hle. Hei vang hian an ram economy harsatna thleng chinfelna tur kawng khat atan President hian sorkar hi a ṭhiat a ni.

President Hassan-an Prime Minister atana a ruat Motazz Moussa chuan 2017-a PM atana ruat Bakri Hassan Saleh a thlak nghal a ni. Moussa hi sorkar ṭhiah a ni hma hian irragation leh electricity minister a ni.

PM atana thlak tak, Bakri Hassan Saleh chu post siam thar, first vice president-ah dah a ni dawn a, Osman Yusuf Kubur chu second vice president a ni ang. Minister thar turte erawh puan a la ni lo a, mahse minister awm zat 31 chu 21-ah tihtlem tum a ni. Hei hi sorkar sum senral tihtlemna tura ruahmanna pakhat a ni. Hassan chuan sorkar thar din a nih hunah foreign affairs, defence leh presidential affairs minister-te chuan an post ngai an chelh chhunzawm leh dawn niin a sawi.

Thil man sang chak zel, pawisa indaih lohna leh commercial bank-te sum indaih lohna hrang hrang avangin Sudan sorkar hian a sum hmanral pawh tihtlem tumin hma a la mek. Bank-ten sum an neih tam tawk loh vangin pawisa lakchhuah tuma intlar an thui thei hle a, hun eng emaw chen chu ATM-ah pawh pawisa lakchhuah tur a awm mumal tawh lo. ATM

aṭanga pawisa lakchhuah theih zat hi nikhatah Sudanese pound 500 (dollar 16.60) chinah bithliah a ni.

Nikum aṭang khan Sudan ramah ei tur leh thil dang man hi a let hnih aia tamin a sang chho tawh a, an pawisa hlutna a tlakhniam bawk avangin ram dang aṭanga thil lakluh thlengin a nghawng a ni. Thil man sang chak avangin kumin January thla khan nawrh huaihawt a ni tawh bawk.