Brazil President thlannaa chuh turin Lula hming theh lut

Brazil-a Workers' Party (PT) chuan jail-a tang mek, President hlui Luis Inacio Lula da Silva chu an ram president thlanna a an party candidate turin a hming an thehlut.

Electoral court-a Lula hming thehluh dawn hian amah thlawptu mi tam tak an pungkhawm a, Lula chu President atana an duh thu leh, chhuah zalen tura a phutna thute an aupui a ni.

Mahse prosecutor general chuan Lula hi court-in thiam loh a chantir tawh avangin Lula-an inthlan a chuh tumna hi a hnawlsak nghal a ni. Lula hian thiam loh chantir a nihna hi ngaihtuah ṭha leh turin ngen mah se, a appeal dilna ngaihtuah hun tur hi tihfel a la ni lo. Hei vang hian an ram danah president dinhmun hi a chuh thei rih lo a ni.

Lula hi thuneihna a chan laia thamna laa puhna thubuaiah thiam loh chantir a ni a, kum 12 tang tura hrem a ni. Engineering firm OAS hnen aṭangin thamna dollar maktaduai 1.1 dawngah puh a ni. Mahse Lula chuan an puhna hi thu dik lo niin a sawi thung a, thuneihna a chan leh tur danna tura an phiarrukna mai niin a sawi.

Kum 2002-2011 chhunga Brazil President dinhmun chelhtu, Lula hian thuneihna a chan chhungin an ram sum dinhmun nasa takin a chawikang a, khawtlang siamṭhatna programme pawh nasa taka kalpuiin, an ram mipuite lakah pawh a tla na hle. Tun thlengin an ram president atana duhtu mi tam tak an la awm a ni.