Dan chunga leng tumah an awm lo - Myanmar minister

Myanmar sipai court-in civil hruaitu hlui, Aung San Suu Kyi-i kum li tang tura hremna a pek chungchang a sawinaah, sipai sorkara information minister Maung Maung Ohn chuan tumah dan chunga leng an awm lo a, sipai hotu lu ber chuan lainatna lantirin hremna pawh a tihnepsak niin a sawi.

Minister hian virtual hmanga media mite a kawmnaah, Myanmar judicial system chuan hleih a nei lo tih sawiin, Thawhṭannia Suu Kyi hremna pawh chu dan ang taka siam a ni, a ti.

Kum 76 mi, Suu Kyi hi thubuai a neih eng emaw zat zinga pahnihah thiam loh chantir a nih hnuah, kum hnih ve ve tang tura hremna pek a ni.

Maung Maung Ohn chuan an ram dinhmun pawh a ziaawm chho tawh nia sawiin, ram chhunga nawrh huaihawt thleng mek pawh sipai rorelna duh lotuten an nawrna vang a ni, a ti. Hetiang nawrh huaihawt hi dan hmanga lo dan leh ven an ngai a ni, tiin a sawi.

Court-in kum li tang tura Suu Kyi a hrem hi ram hrang hrang chuan na takin an sawisel zui nghal a, European Union pawhin court rorel danah politic inhnamhnawih nia sawiin, human rights palzutna chiang tak a ni, a ti.