Guatemala tlang kang vanga thi pun belh

Guatemala ram khawpui, Guatemala City bula Fuego tlang kangin chhiatna a thlen vanga thi chu mi 65 an tling tawh niin National Coordination for Disaster Reduction of Guatemala (CONRED) chuan a tarlang.

CONRED chuan tlang kangin vut leh chirh sa a phuhchhuahna hmunah ruang hmuh belh zel an nih thu a sawi a, Thawhṭanni zan thleng khan thi zat hi 65 an kai tawh tih a sawi a ni. Chin hriat loha awm eng emaw zat an la awm bawk a, hei vang hian thi zat pawh hi an la punchhoh rin a ni bawk.

Pathianni-a Fuego tlang kang hi hun rei tak chhunga Gautemala rama tlang kang nasat ber ṭum niin CONRED chuan a tarlang. Tlang kanna bul hnaia cheng mi 3,271 chu hmun him lamah sawnchhuah an ni a, an zinga mi 1,916 chu sorkarin an awmna lailawk tur a siamah an khawsa zui a ni. Tlang kang hian mi maktaduai 1.7 khawsak phung a nghawng buai a ni. Tlang kang aṭanga vut sa inphuhchhuak hi Honduras thlengin an tuar pha a ni.

Vut sa leh meikhu phuhchhuah nasat avanga Guatemala City-a La Auroa international airport khar chu nimin khan hawn a ni leh tawh a, mahse airline ṭhenkhat erawh chu security venthawn thilah an la service tir duh lo.