UK-ah Covid-19 kai thar 50,000 dawn awm

Britain-ah Covid-19 kai thar 49,139 awm belh lehin, hei hi thla thum liam hnua inkharkhip an tihtawp hnua nikhat thil thua Covid kai an hmuhchhuah tam ber ni a nih thu official-te chuan Nilaini khan a tarlang.

Ni riat chhung a zawnin Covid-19 kai thar mi 40,000 chuang an awm chho leh tawh a,ramchhunga coronavirus kai hmuhchhuah tawh hi mi 85,89,737 an tling.

Coronavirus vanga thi 179 awm belh lehin, heng mite nen hian Britain-a hri kaihhnawih vanga thi zat chu 1,39,031 an tling tawh a ni.

Covid-19 kai, damdawi-ina enkawl lai mi 7,891 an awm mek bawk.

Hri kai an pun chhoh leh avangin National Health Service (NHS) Con­fe­deration chief execu­tive Mathew Taylor chuan sorkar chu hri laka invenna kaihhruaina te siam leh turin a ngen. Taylor chuan vantlang hmunah hmai tuam­na hmanna tur thupekte siam leh turin a duh thu sawiin, "Kan dinhmun thlirin rang taka chet kan lak leh vat a ngai a ni," a ti.

British Medical Asso­ciation chuan face mask vuah chungchang a thlah­dul avangin sorkar hi an sawisel bawk.

Heti lai hian health secretary Edward Argar chuan hri kai hi an pung chho leh dawn tih pawh an hria a, hemi atan hian an lo inbuatsaih reng thu a sawi. NHS hospital hrang hrangah hri kai enkawlna tur khum 95,000 vel awmin, heng zinga khum 6,000 vel chu a la ruak a ni, a ti.

Health secretary Sajid Javid pawhin ni khata hri kai hi nuai khat pawh an la tling maithei tih a sawi a, mahse khuahkhirhna thar siam tura rawtna erawh a hnawl.

Hemi rual hian vaccine indaih tawk lohna a awm chho a nih erawh chuan khuahkhirhna hi siam a ngaih rin a ni thung.