Taliban-in thihchilh bomb tipuaktute a fak ; An chhungte hnenah ram pek a tiam

Afghanistan-a rorellai, Taliban sorkara acting interior minister Sirajuddin Haqqani chuan an pawl mi leh sa, US leh Afghanistan sipaite beihna tura thihchilh bomb tipuaktute chu fakin martar-ah a puang a, an chhungte hnenah ram leh pawisa pek a tiam.

Kabul-a Intercontinental Hotel-ah thihchilh bomb tipuaktu chhungte eng emaw zat chu pungkhawmte hmaa thu a sawiah, Haqqani chuan an hmelmate neihna tana thihchilh bomb tipuaktute chu Islam leh Afghanistan tana pasalṭhate an ni, a ti. An chhungte hnenah hian an ram pawisa, Afghanis 10,000 (USD 112) ṭheuh a sem a, hei bakah ram pek a tiam bawk. An punkhawmna hmun Intercontinental Hotel hi kum 2018 January thla khan Taliban-te chuan beiin, hotel-a thleng mikhual leh thawktu eng emaw zat an man a ni.

Kumin August thlaa Taliban-ten thuneihna an chan hma khan, kum 20 chhung chu Afghan leh US sipaite nen an inbei a, Taliban-te hian an hmelmate beihna atan hian thihchilh bomb an tipuak fo a ni. Acting interior minister Haqqani hi US-in firfiaka a puan mek niin, a lu manah pawh USD maktaduai 10 a phal a ni.