Covid hluar zel vangin Putin-a'n kar khat chawlh puang

Russia President Vladimir Putin chuan an rama Covid-19 hri kai an pun zel avangin kar khat chawlh (non-working week) a puang a, Russia mipuite an mawhphurhna hlena vaccine la vek turin a chah bawk.

Russia ramah hian ni khatah coronavirus vanga thi tam ber ni record siamin, mi 1,028 an thi a, hei vang hian sorkarin hri darh tur venna atana kar khat chawlh puan a rawtna hi President Putin pawh hian a pawmpui ta a ni. Putin hian May thla khan hri leng vang hian paid holiday hi a lo puang tawh bawk.

Nilaini khan TV-ah President Putin chuan he thu hi puangin, October 30 aṭangin kar khat chhung chawlh puan a nih thu a sawi a, "Kan tum ber chu kan khua leh tuite nunna venhim a, hriselna ṭha an neih hi a ni," a ti.

Kum 69 mi, Putin chuan Russia-a hripui chak taka a darh nachhan ber chu vaccine la an tlem vang a nih thu a sawi. Russia-ah hian anmahni ram siam Covid vaccine, Sputnik V bakah midang siam vaccine pawh eng emaw zat hman theih ni mah se, vaccine dose bikima la hi 35% vel chauh an la awm.

Putin chuan mi tam tak, a ṭhiantha tak pawh tela vaccine la duh lo an awm chu mak a tih thu sawiin, "Zirna ṭha tak tak dawng, scientific degree neite pawh an awm. Eng thil nge thleng ka hrethiam lo a ni," a ti hial. Vawi tam tak Russia mipuite chu vaccine la ṭha turin alo ngen tawh a, Nilainia thu a sawiah pawh ngen nawn lehin, an mawhphurhna a ni tih hrethiam turin a ngen.

Nilaini khan Russia-ah hian hri kai thar hi 34,000 chuang awm lehin, hri thihpui hi 2,26,353 an tling tawh bawk a, Europe ram zingah hri vanga thi tamna ber ram an ni mek.

Russia thuneitute hi hri leng sawi nepah puh an ni fo a, hetihlai hian President Putin chuan bial hrang hranga thuneitute chu hri kai zat dik tak puangzar turin a ti a, zep neih chu thil hlauhawm tak a nih thu a sawi.

Deputy prime minister Tatiana Golikova chuan hri leng vanga khuahkhirhna siam thar leh chu a ṭul tih sawiin, "Tun hnaia kan mite sang chuang kan chan a, a rapthlak hle a ni," a ti. Russia ram bial hrang hrangte pawh inzinpawh lo turin a ngen bawk.