Indonesia police hmunpuiah thihchilh bomb tipuak

Indonesia khawpui lian pahnihna, Surabaya-ah nimin zing khan thihchilh bomb pahnih chu police headquarters-ah tihpuah a ni a, police pakhat a thi. Pathianni khan Surabaya khuaa Kristian biak-in pathumah thihchilh bomb tihpuah a lo ni tawh bawk a, biak-in beihnaa thi hi mi 14 an tling tawh a ni.

East Java Police thupuangtu Frans Barung Mangera chuan security checkpoint-ah bike-a mipa leh hmeichhe pakhat inphurten an bomb pai hi an tipuak niin a sawi. Police pakhat a thih bakah midang 10-in hliam an tuar a, an zingah hian civil mi paruk an tel. He pawikhawihna thleng hi eng pawl mahin an tih niin an la chhal lo.

Pathianni-a biak-in pathuma bomb tipuaktute hi chhungkaw pakhata mi paruk an ni tih police-te chuan an sawi. Bomb tipuaktute hi nu ber leh pa ber bakah, an fanute pahnih kum 9 leh 12, fapate pahnih um 16 leh 18-te an ni a, Islamic State (IS) firfiak pawl thlawptu, Jamash Ansharut Daulah (JAD) pawl nen inzawmna nei niin police hotu Tito Karnavian chuan a sawi. Biak in beitute chu Syria ṭanga rawn kir niin media report chuan a tarlang bawk.