US-in Jerusalem-a embassy a hawng

US President Donald Trump-an nikum December thlaa Israel khawpui atana Jerusalem a pawm thu a puan hnuah, US embassy pawh Tel Aviv aṭangin Jerusalem-a sawn a nih tur thu a lo sawi tawh a, nimin khan Jerusalem-ah US embassy chu sawnin hawn a ni ta.

Jerusalem-a US embassy hawnna inkhawma tel tur hian Israel-a foreign ambassador 86 awmte chu sawm vek an ni a, ram tam zawkin he sawmna hi an pawm a, hetihlai hian European Union chuan US thiltih hi a dodal thung.

US embassy sawn tur hi ahma aṭangin Palestinian chuan dodalin lungawi lohna pawh an lo lantir fo tawh a, hei vang hian nimina hawnna inkhawm buatsaih lai hian buaina an chawh chhuah venthawn thilah Jerusalem khawpuiah venhimna khauh taka kalpui a ni. Embassy awmna tur, Arnona ah chuan police ṭhahnem tham tak duty tir an ni.

Embassy hawnna inkhawma tel tura US official kal zingah hian President Trump-a fanu, Ivanka Trump leh a pasal Jared Kushner-te pawh an tel a, Treasury Secretary Steven Mnuchin leh Deputy Secretary of State John Sullivan te pawh an tel a ni. President Trump erawh a tel lo.

Israel Prime Minister Benjamin Netanyahu chuan US hnung zui a, Jerusalem-a a embassy sawn ve turin ram dang hruaitute a ngen nghal bawk.

US-in Israel khawpui atana Jerusalem a pawm thu a puan hnuah Tel Aviv aṭanga Jerusalem-a a embassy a sawn avangin a chungah Israel chu a lawm reng tawh dawn tih a sawi bawk. Jerusalem chu Israel khawpui a ni reng dawn a ni, a ti. President Trump-a chu huaisen taka thutlukna a siam avanga fakin, tih tur dik tak a ti a ni, a ti.

US-in embassy sawn tur thu a puan hnua Jerusalem-a embassy sawn ve an tum thu sawitu, Guatemala leh Paraguay ram hruaitute chungah pawh Netanyahu chuan lawmthu a sawi nghal bawk. Jerusalem-a embassy sawn tum ram dangte pawh an awm tih a sawi a, mahse a ram hming erawh a sawilang lo.

Hetih lai hian Al-Qaida hruaitu Ayman al-Zawahiri chuan US-in Jerusalem-a embassy a sawn chu Palestinian nena inremna kawnga hmalakna tihchhiatna leh hlawhchhamna lantirtu a ni tiin, khawvel ram hrang hranga Muslim-te chu US laka indo puang turin a chah. Al-Qaida hruaitu hian minute nga awh video tichhuakin, Bin Laden pawhin US chu Muslim-te hmelma lian ber tia a lo puan tawh thu a sawi. US President Donald Trump chu Palestinian te ram laksak tuma Kristian ten an beih rukna lantirtu dik tak a ni tiin, dawhthei taka dawr chi a ni lo a, indona hmanga beihlet a ngai a ni, a ti.

Jerusalem hi Israel ram khawpui lian ber niin, Israel mipui zinga 10%, vel zet chu he khawpuiah hian an cheng a ni. Khawpuia cheng zinga 62.3% chu Juda niin, Palestinian mi 37.7% an awm bawk. Jerusalem-ah hian sorkar ministry-a branch 140-ten office an nei a, thawktu mi 2,700 vel an awm a ni. Prime Minister office leh ministries of health, finance, transportation, culture and sports, education and welfare branch-te pawh Jerusalem-ah hian dah an ni.