Myanmar-a hel leh sipaite inbeihna vangin mi tam tak tlanchhia

Myamar hmartawp, Kachin state-a Kachin helpawl leh sipaite inbeihna avangin himna zawngin mi tam tak an tlanchhia.

United Nations chuan hel leh sipaite inbeihna avangin April thla chhung hian mi 4,000 vel chuan an in leh lo an tlanchhiatsan tawh niin a sawi.

Kachin helpawl, Kachin Independence Organisation (KIO) leh sorkar sipaite hi hun rei tawh tak aṭangn an inbei fo tawh a, tun hnaiah sipaite hian thlawhtheihna leh laipui hmangin hel ho lakah hian beihpui an thlak thar leh a ni.

Inbeihna thleng vanga mi tam tak an tlanchhiat bakah, China ramri bulah mi tam tak an tangkhang mek bawk nia hriat a ni. Chhawmdawl hna thawktute chuan ṭanpui ngaite pui thuai tur hian sorkar an ngen a ni.

UN hnuaia Office for the Coordination of Humanitarian Affairs (OCHA) hotu Mark Cutts chuan an thil ngaihpawimawh ber chu civl mite himna a ni tih sawiin, raipuar te, kum upa zawk leh naupangte bakah pianphunga rualbanlote himna chu ngaih paiwmawh a ni tih a sawi. Heng mite himna tur hian theihtawp chhuah a ngai a ni, a ti.

Kachin hnam hi a tam zawk chu Kristian an ni a, kum 1961 chho aṭang khan an state tana thuneihna sang zawk pek phut hian an lo bei tawh a ni. Kachin hel leh sorkar sipaite inbeihna avang hian Kachin leh Shan state hmarlama cheng mi 120,000 vel chu an tlanchhe tawh nia chhut a ni.

Myanmar sorkar chuan kum ruk kalta chhung khan an rama hnambil helpawl eng emaw zat chu iremna a lo siampui tawh a, mahse KIO hi inremna a la siampui thei lo a, Myanmar rama helpawl hlauhawm ber zinga mi a la ni chho reng a ni.