Pope-in chemical ralthuam hman a dem

Pope Francis chuan Syria rama helho awmna, Eastern Ghouta beihna atan tur hlauhawm, chemical ralthuam hman nia sawi chu a dem thu a sawi.

Pathianni-a St Peter's Square-a mipui pungkhawmte hmaa thu a sawiah, Pope chuan tur hmanga beih vangin Syria rama mi tam tak, a bikin hmeichhia leh naupang tam tak an thi tih chanchin duhawm lo tak an hriat thu a sawi. Indona-ah hian a ṭha leh ṭha lo a awm lo a, hemi rual hian invenna nei lo leh mipui nawlpuite beihna atana tur hlauhawm tak hman chu eng kawng maha ngaihnathiam leh insawifiah theih a ni lo, a ti.

Kar kalta Inrinni khan Syria President Bashir al-Assad-a thlawptu sipaite chuan Damascus bula eptu kuta awm, Douma khua an beihnaah chlorine gas an hmang nia sawi a ni. Mahse he puhna hi Syria chuan a dik lo niin a sawi a, Syria ṭhianṭha ram Russia pawhin a pawm lo bawk. Syria state media-te chuan tur hmanga puhna chu helho phuahchawp mai niin an sawi.

Pope chaun ram hruaitu leh sipai hotu tena buaina chinfelna atana tharum leh indona hmang lo a, inbiakna an hman zawk theihna atan mipuite chu ṭawngṭai turin a sawm bawk. Inbiakna chu thihna leh chhiatna thleng loa muanna siam theihna kawng awmchhun a ni, a ti.