Hungary inthlanpuiah rorellai an chak

Pathianni-a Hungary inthlanpui neihah rorellai, Prime Minister Viktor Orban-a kaihhruai Fidesz-KDNP ṭangrual chuan hnehna an chang. Orban chu a term thumna atan Hungary prime minister a ni leh dawn a ni.

National Election chuan vote tla hi chhiar zawh thawhkhat a ni tih sawiin, vote tla aṭanga 49.2% chu rorellai lai hian an hmu a, Jobbik party chu pahnihna niin vote 20% an hmu. Vote tla aṭanga 12.13% hmutu MSZP-P (Socialist-Dialogue) chu pathumna a ni. Tun ṭum inthlanpuiah hian party pahnih chu Parliament-a member nei turin an tling thar bawk a, chungte chu vote 6.69% hmutu LMP leh left-liberal DK (Democratic coalition) vote 5.45% hmu te an ni.

Result hi puan zawh thawkhat a nih tawh vangin Fidesz-KDNP ṭangrual hian parliament seat 199 ah seat 134 an nei dawn a, kum 2014 leh 2010 inthlanpui ang bawkin majority an nei pha dawn a ni.

Inthlanah hian PM party hi thingtlang lam leh provincial town-ah an che ṭha a, an ram khawpui Budapest-ah erawh chuan eptu lamte an chak thung.

Viktor Orban hi an ramri te humhalh a, an rama pemlutte khuahkhirhna siam duhtu a ni a, campaign lai pawhin hei hi a auhla ber niin, Muslim pem lut turte dan a tiam a ni. Campaign lai hian PM hian mipui hmaa a khingpuite nena debate neih leh, independent media hmaa thusawi a duh lo a, rally-ah thu a sawi zawk ṭhin. Orban chuan an ram pemlutte chu khuahkhirh an nih loh chuan Hungary chu an la chimral mai thei dawn niin a sawi. Kum 2015 khan dan loa pem lutte danna atan Serbia leh Croatia nena an inri-na chu a lo hung tir tawh a ni.

Orban hi an ram inrelbawlnaa EU inrawlh duh lohtu a ni bawk a, EU refugee resettlement programme pawh a zawm duh lo a, Russia President Vladimir Putin a fak ṭhin hle.