Israel-in Gaza-a Hamas ho hmun bei

Israel sipaiten nimin khan Gaza Strip hmar lama Hamas ho hmun chu thlawhtheihna hmangin an bei a, mahse thil tichhiat lian tham leh thi erawh an awm lo.

Israel sipaite chuan Pathianni-a Palestinian miten ramri paltlang luih vang leh, ramri-ah bomb-te an kam avangin a chhan let nan an bei niin an sawi. Israel sipaite hian Pathianni khan Gaza hmarlama ramri hungna kaltlang luite bomb an kam chu an hmuchhuak tih an sawi a ni.

Tun hnaiah Gaza Strip leh Israel ramri-ah hian Palestinian mi pungkhawm leh Israel sipaite inkarah buaina nasa tak a chhuak a ni. Palestinian mite hian lung leh hmanraw dangin sipaite hi an tawng a, sipaite hian mipui hnawhdarh nan hian mittui tlakna hlo an hman bakah silai pawh an hmetpuak a ni. Ramri-a buaina chhuakah hian Palestinian mi 30 an thi tawh niin Gaza health ministry chuan a tarlang.

Sipaiten silai an hmehpuah chungchangah Israel chuan sawisel a tawk nasa hle a, mahse Israel chuan ramri hungna tihchhiat tuma beihna, ramri kaltlang luih tum leh sipaite kutthlak tumte dan nan a ṭul tawpah chauh silai hi an hmetpuak niin a sawi. Gaza Strip-a roreltu, Palestinian firfiak pawl Hamas-te chu mipuite nawrh huaihawt hi tharum thawhna remchangah a lo hmang niin a puh bawk.