Myanmar sipai sorkarin Tokyo-a an ram official 2 ban

Myanmar sipai sorkar chuan Tokyo-a an ram emba­ssy-a thawk official pahnih chu sipai rorelna duh lohna lantira nawrh hauihawtte an thlawp avangin a ban.

Japan-a Kyodo news agen­cy chuan official bante hi administrator Aung Soe Moe leh a hnuaia thawk pakhat a nih thu a tarlang. Official pahnihte hian Facebook-ah Myanmar rama nawrh huaihawtte an thlawpna thu an post a ni. Hei vang hian an hna aṭanga ban niin, embassy pawh an chhuahsan tawh a, an passport pawh tihtawp sak an ni bawk. Tokyo-ah Myanmar mi awmte puihnain an la khawsa mek nia sawi a ni.

Kyodo chuan Myanmar sipaite hian ram hrang hranga an palai zingah an rorelna dodaltu mi 100 vel an ban tawh niin a sawi bawk.

Japan sorkar thupuangtu Katsunobu Kato chuan Myan­mar embassy chuan an official-te pahnih ban an nih thu leh, an diplomatic visa pawh hnawl a nih thu a hriattir tawh niin a sawi. "Foreign ministry chuan thil awmdan hi zirchiangin, eng anga hma lak tur nge tih a ngaihtuah dawn a ni," a ti.

Myanmar sipaite hian nawrh huaihawt chungchang report-tu, Japan journalist pakhat a lo man tawh bawk a, mahse Japan sorkar ngenna avangin a chhuah leh tawh a ni. Japan hi Myanmar ram chhawm­dawltu pawimawh ram zingah a tel a, mahse mipui sorkar paihthlak a nih avangin March thla aṭang khan chhawmdawlna a pek ṭhin chu a titawp a ni.