NECS Cup Semifinal 1st Leg Republic Veng leh Lengpui an chak, a la zo lo

NECS Cup semifinal thawhkhatna chu nimin khan Lammualah khelh a ni a, Republic Veng chuan champion lai Ramhlun South lakah 1-0 in hma an hruai. Inkhel hnuhnung zawkah Lengpuiin Armed Veng lakah goal khat thoin hma an hruai bawk.

Second leg hi March 27, Nilaini hian khelh a ni dawn a, 'away goal rule' a awm lo. Inkhel pahnih belhkhawma chak zawkin final an lut dawn, an inhnehtawk chiah erawh chuan extra time (15+15) khelh a ni ang a, an la inhnehtawk cheu chuan penalty shootout hmanga chak zawk zawn tur a ni ang.

Chak phu zawk chak
Ramhlun South-in player langsar an kawl hnem a, Malsawmfela thlawptu a nau Lalnunmawia bakah Lalremruata leh NECS Cup top scorer ni lai R. Lalthanmawia (Amawia) te nen bul an ṭan a. Chak tura rin zawk an ni na a, rinrawl ber Sawmfela ke aṭanga ball chhuak fing mah se tlan tam turin theihna a neih bik loh avangin an goal nawr a na lo a, Republic Veng defender Lalmuanawma a khel ṭha bawk.

Republic Veng lamah F. Lalrinpuia thlawp turin MPL-a midfielder ṭha pathum Paul Ramfangzauva, K. Lalnunzama (Valtea) leh Lalruatfela te a nei a, minute 90 chhungin an goal nawr a na zawk. Valpuia'n first half tawp hmain crossbar a tauh per a, Valtea goal khung tur goalline-ah dan a ni a, substitute Lalhriatpuia ball tauh chu keeper-in a dan hnuah crossbar a per bawk.

Ramhlun South pawhin Amawia hmangin chance ṭha an nei a, mahse amah thlawptu Remruata a pek loh avangin engmah lo maiah a chhuak. An inhnehtawk tura a lan laiin minute 87-naah Valpuia ball fing chu rawlthar duhawm Hriatpuia'n 'cool' takin goal-ah a chantir, second leg khelh tur a nih avangin Republic Veng-in goal dang an khung belh loh an ui khawp ang.

Hei le, Lengpui chu

Lengpui hi tun hmaa thingtlang khua inkhelh thiam ve tak ringawt kha an ni tawh lo a, an player-te hi India jersey bakah Germany thlenga inzir tawh te an ni a, an ṭha tih hi tualchhung football hrechiang te hmuh dan a ni a. Nimin khan a dikna pholanin a awm a, first half-a India junior team player Lalrokima goal hmangin team ṭha Armed Veng 1-0 in an hneh.

Armed Veng hi goal khata an chak loh avangin final khelh beiseina a bo tihna erawh a ni lo a, first leg-ah pawh hian Lengpui tlarhnung ten winger tlan chak Lalmuanzova an chelh thei lo a, amaherawhchu an hmawr an bawk fuh thei lo. Chutihrualin Lengpui tan tawnhriat nei ṭha Rohmingthanga chu tun hmaa a khelhna ṭhin midfield-ah rawn awm chhoin tha ngah zawk captain Joe Zoherliana tha a hmang thiam a, first half-ah goal an khung avangin second half-ah goal venhim hna an thawh theih phah.

Amaherawhchu tunah hian minute 90 chauh an la khel a, talent nei ṭha tamna Lengpui hian 2015 NECS Cup final-a an hneh tawh loh Armed Veng lakah hian an ṭang zo dawn em tih chu second leg-ah hriat ang.