Djokovic a chak zel

Tennis mipa world number 1 Novak Djokovic chuan a vawi sarih nana Miami Open nomawi chawi a tumna a chhawm nung a, nimin zing khan Federico Delbonis chu 7-5, 4-6, 6-1 a hnehin fourth round a inhlangkai.

Roger Federer ang bawkin Djokovic hian third round inkhelah hian awlsam takin hnehna a chang bik lo. Darkar hnih chuang an inkhelh hnuah seeded pawh chang phak lo hi a hneh ram a, a match lehpekah chuan Roberto Bautista Agut a hmachhawn leh ang.

Grand Slam vawi 15 champion tawh Djokovic chuan, "Tun hnai ka match ṭhenkhatah hian set hmasa ber ka khel ṭha tawk lo ṭhin, harsa takin set ka la hram a, inkhel pumpui thlir khan Federico khan fak a phu hle," tiin vanneih vanga hnehna chang a nihna a pawm thlap.

Serbian tlangval hian Argentine player a hneh thei hle, Federico a hneh leh chiah khan Argentine player lakah vawi 36 a chakna chiah niin ṭum thum a tlawm tawh thung. A hneh loh hnuhnung ber chu Juan Martin del Potro niin 2007 khan a ngam lo a ni.

Djokovic a hmachhawn leh tur Agut hian seeded 15-na Fabio Fognini chu 6-4, 6-4 in a lo hneh ve bawk a, Italian tlangval hi Djokovic tan awlsam taka nuai liam ngawt theih a ni lo mai thei - fimkhur a finthlak ang.

Inkhel dangah Nick Kyrgios a khel ṭha hle, Australian tlangval hian darkar khat pawh tling loah Dusan Lajovic chu 6-3, 6-1 in a sawp. Kyrgios hian seeded 11-na Borna Coric a hmachhawn leh dawn a, Croation player hian Jeremy Chardy chu 6-7(2), 6-2, 6-3 in a hneh ve bawk a ni.