Indian Open beiseitu Sindhu leh Srikanth

Badminton inelna ngaihhlut pakhat Indian Open chu vawiin aṭang hian K. D. Jadhav Indoor Hall, New Delhi-ah khelh ṭan a ni dawn a, tualchhung player ṭha P.V. Sindhu leh Kidambi Srikanth ten tun hma lama hlawhtlinna an lo chan tawhna hmunah champion leh an tum dawn.

World number 1 Saina Nehwal chu a pum lam chian lohna vangin a inlan thei dawn lo a, London Olympic bronze medalist inlan thei lo tur hi India tan chuan channa lian tak a tling.

Rio Olympic silver medallist Sindhu hian nikum khan season kharna World Tour Finals-ah hlawhtlinna a chang a, player ṭha dang hneh turin theihna a nei tih a chiang. Indian Open-ah hian seeded pakhatna leh All England champion ni lai Chen Yufei a inlan theih dawn loh avangin Sindhu tan beiseina a sang zual dawn.

Season hmasa lama Commonwealth Games, Asian Games leh World Championship-a silver medal latu Sindhu hian tun hnai kum hnih chhung chu Indian Open-ah hian final a thleng a, 2017 khan a champion.

Kum 23 mi Sindhu hian a match hmasa berah chuan Indian shuttler tho Mugdha Agrey a hmachhawn dawn a, a chak zel a nih chuan quarterfinal-ah seeded pariatna Mia Blichfeldt nen an intawh theih dawn bakah, final kalkawngah seeded pathumna He Bingjiao a tawk thei dawn bawk.

Indian Open hi tun hnai thla 17 chhunga nomawi chawi lo Srikanth tan fiahna a ni dawn. Mipa singles champion lai leh seeded pakhatna ni bawk Shi Yuqi a inhnukdawk a, hei vang hian Srikanth tan kawng a inhawng. Mahse, 2017 champion Viktor Axelsen a awm dawn avangin awlsam taka tlang theih a ni bik dawn lo.

Kum 26 mi Srikanth hian 2017 khan nomawi pali ngawt a chawi a, season hmasa khan inelna hrang hrangah quarterfinal thleng ṭhin mah se a hmawr a bawk fuh thei ngai lo. Match hmasa berah Hong Kong tlangval Wong Wing Ki Vincent nen an inkhel anga, Indian shuttler dang Sameer Verma emaw B Sai Praneeth zawk a hmachhawn leh ang.