US President Barack Obama chuan Republican senator te'n Iran sorkar hnena lehkha an thawn chu sawiselin, nuclear talk neih meka inrawlhah a puh a, senator-te thiltih dan chu âwm lo a tih thu a sawi. 

Ram thiltithei, P5+1 (US, UK, France, Russia leh China + Germany) leh Iran ramte hian Iran nuclear program chungchangah inbiakna an nei mek a ni. UN in Iran a hrekna tihnep a nih theihna atan Iran hi a nuclear program kalpui mek titawp tir tumin an dawr mek a ni. 

Republican senator te'n lehkha an thawnah hian Iran inremna siampui tuma inbiakna neih mek chu Congress-in a pawmpui loh chuan a hming mai a ni dawn tih an sawi. He lehkha thawnah hian Senate-a Republican senator 7 te'n hming an ziak a, Obama party, Democrats member te erawh chuan an hming an ziak lo. 

Senator-te chuan international agreement siam dawna Congress pawimawhzia te sawilangin, President Obama chuan  kum 2017 January thlaah office a chhuahsan tawh dawn a, Congress pawmpui loh inremna chu a hming mai a nih thu leh, Congress chuan a hnawlsak thei a ni tih thute an tarlang. 

Kar hmasaa Israel President Benjamin Netanyahu-a'n Congress-a thu a sawi khan tuna Iran inremna siampui tuma an biak mek dan chu Iran tana nuclear bomb siam theihna tura kawng sial saktu a ni tiin a lo sawisel tawh bawk. 

Share this Post