Malaysia Parliament chuan nimin khan kum khat liamtaa chin hriat loha bo, Malaysian Airlines thlawhtheihna MH370 hriatrengna hun a hmang.

Speaker Pandikar Amin Mulia chuan, "MH370 chunga chhiatna thleng hian rampum a nghawng a ni. Chhanchhuah hna thawh chu chhunzawm reng a ni a, parliament member-te chuan thlawhtheihnaa chuang chhungte chu hun khirh tak an tawh mekah chak taka an awm a duhin a beisei a ni," a ti. 

Kum 2014, March 8 khan MH370 hi Kuala Lumpur aṭang Beijing pana a thlawh laiin chin hriat lohin a awm a, hun rei tak zawn ni tawh mah se tun thlengin he thlawhtheihna chanchin hi hriat a la ni lo. Thlawhtheihnaah hian mi 239 an chuang a ni. 

Australia, Malaysia leh China te chuan Australia khawthlang lam, thlawhtheihna tlakna nia rin, Indian Ocean-ah thlawhtheihna tla emaw hi hun rei tak an zawng a, square km 60,000-a zau an tuam a, mahse engmah hmuh an la nei lo. 

Hetihlai hian Australia khawthlang lama tuipui kamah nupa pakhatin tuipui aṭanga towel package rawn chhuak an hmuh chu investigator te'n an chhui chiang dawn. Nupa hian an thil chhar hi police-te kutah an hlan a, anni hian Canberra-a Joint Agency Coordination Center (JACC) hennah an hlan ve leh a ni. JACC hian thlalak hi a tichhuak duh lo a, thlawhtheihna bo nen inzawmna a nei kher lo maithei niin a sawi bawk.

Share this Post