Russia eptu hruaitu, Boris Nemstov-a kaphlumtu nia rinhlelh mi dang pahnih chu Pathianni khan man belh leh an ni a, pakhat zawk hi Chechnya biala police hna thawk ṭhin a ni. A hmain mi pathum man an man tawh bawk. 

Pathianni khan Moscow courtroom-ah mi panga-te hi hruai an ni a, Judge Natalia Mushnikova chuan an vai hian police-te kuta awm rih turin a ti. 

February 27 khan Nemstov hi Russia parliament, Kremlin bul hnaiah ke-a kal laiin kahhlum a ni. Nemtsov hian Russia President Vladimir Putin leh Russia sorkar a sawisel a, lungawi lohna kawngzawh huaihawt a tum hma ni lawkah kahhlum a ni. Hei vang hian a thihnaah hian Putin leh Russia sorkar chu inhnamhnawihna neiah eptu lam chuan an puh a, mahse an ni chuan an puhna hi an pha thung.

Chechen hruaitu leh Putin-a lamṭang, Ramzan Kadyrov chuan police-te mi man zinga pakhat, Chechen police hlui Zaur Dadayev chu Muslim ruh tak niin, France chanchinbu Charlie Hedbo-in Prophet Mohammad-a cartoon a chhuah chungchangah pawh khan a thinur hle a ni, a ti. Liberal hruaitu, Nemstov hian Charlie Hebdo cartoon tihchhuah Islam firfiakte'n kumin January thlaa an office bei a, thawktu mi 12 an kahhlumna thleng kha a dem thu a lo sawi tawh a ni. Hei vang hian Nemstov hi Islam firfiakte thah a ni thei em tih chhuichian mek a ni bawk.

Share this Post