Palestinian-ten Gaza border-ah kawng zawh

Palestinian-te chuan kar kalta Inrinni khan ruahsur nasa tak hnuaiah Israel-Gaza border-ah 'Great March of Return' nawrh huaihawt champha pualin kawng an zawh. Kawngzawhte hi Israel tank leh sipaite chuan ramri-ah an lo dang a ni. 

Israel-in Palestinian ram a luahsakte chu a neitu dik tak, Palestinian mite hnena pek kir leh phutna lantirin 'Great March of Return' hi nikum March 30 khan huaihawt a ni a, hun rei tak chhung chu kartinin kartawpah Israel leh Gaza ramri-ah Palestinian mite hian Israel laka lungawi lohna hi an lantir ṭhin. Ramri-ah hian Israel sipaite nen intibuaiin mi 200 velin nunna an chan phah tawh bawk. 

Inrinni-a kawngzawhte hian Israel leh Egypt-in Gaza a danna chu titawp tura an phut thu te, Israel-in an ram a luahsak ṭuma hnawhchhuah, Palestinian mite chu an ram lakir leh tura dikna chanvo an neih thute an sawi. Mahse Israel chuan Jewish majority tichhe turin eng ram mah pekkir a tum lo tih a sawi thung.

Ruah sur nasa viau mah se Inrinni-a Palestinian mi pungkhawm hi an ṭhahnem hle niin Israel security official chuan a sawi a, pungkhawmte hian Israel sipaite chu lungin an tawng a, motor ke te an hal bawk. Mipui pungkhawmte hnawh darh nan hian Israel sipaite chuan silai bakah rubber bullet leh tear gas-te an hmang. Sipaite silai hmehpuahah hian mi pathum an thi a, midang 207 velin hliam an tuar niin Gaza health ministry chuan a sawi.