UK PM May-in a vawi li-na atan Brexit deal vote lak leh duh

United Kingdom Prime Minister Theresa May-i chuan European Union (EU) aṭanga Britain inlakchhuahna tura EU hruaitute nena inremna an siam, Brexit deal chu a vawi li-na atan Parliament-ah ngaihtuah a, vote lak tir leh a tum. 

May-i Bexit deal hi Parliament-ah kar kalta Zirtawpni khan a vawi thumna atan hnawlsak leh a ni. Hei vang hian a tira EU aṭanga Britain inlakchhuah hun tura ruahman, March 29 chu kalpui theih a nih tak loh avangin April 12-ah sawn hlat a ni. 

Zirtawpni-a vote lakah hian a tira May-i deal siam hnawltu, a party Conservative MP eng emaw zat chuan thlawp tawh mah se, Labour Party leh Democratic Unionist Party lamin an dodal avangin a tlang thei lo a ni.

Hetihlai hian EU aṭanga Britian inlakchhuah duh leh duh loh chungchanga mipuite vote lak ṭhat leh phutin kar kalta khan London-ah kawngzawh a ni. Brexit hi titawp tura phutin 'cancel Brexit' online petition pawh kalpui mek a ni a, mi maktaduai nga chuangin an sign tawh a ni.