Trump-an Mexico ramri kharah a vau

US President Donald Trump chuan Mexico-in document mumal nei loa te a ramri kaltlanga US-a lut turte chu a dan loh chuan tunkar chhung hian Mexico ramri kharah a vau. 

Florida-a reporter-ten an kawmnaah President Trump chuan a duh anga Mexico hian a ti lo a nih chuan ramri chu hun rei tak a khar mai dawn tih sawiin, ramri kaltlanga insumdawnna thlengin a khar tel vek dawn tih a sawi. Trump hian a twitter-ah hemi chungchang hi tarlangin, Mexico tan chuan document mumal nei loa US-a luh tumte lo dan chu thil harsa a ni lo a, mahse hma an la ṭha duh lo a, US sum laksak zawk chu an tum a ni, a ti. Trump hian a hma pawhin Mexico ramri hi kharah a lo vau tawh bawk. 

Nikum December thla khan ramri hungna bang siamna tura a sum duh ang zat Congress-in a pawmpui loh chuan US-Mexico ramri tluan chu kharvekah a lo vau tawh a ni. Mahse Congress hian a sum phut ang hi a pawmpui lo a, ramri hi khar loin ni 35 chhung sorkar chu hnathawk mumal thei loa khar, shutdown a ni ta zawk a ni. 

Mexico Foreign Minister Marcelo Ebrard chuan Mexico chuan vau a nih vang ngawtin che tura a ni lo tih sawiin, US nen chuan inṭhenawm ram ṭha tak an nih thu a sawi. "America mi tam takin Mexico hi an ram angin an chhal ang, US pawn lama America mi awm tamna ber a ni", a ti. 

Donald Trump chuan central America ramte chu US-a pemlut tura an mi leh sa tam tak kaltira puha a sawisel hnuin, Inrinni khan US sorkar chuan central America ram - El Salvador, Guatemala leh Honduras ramte chhawmdawlna a pek ṭhin chu a titawp.