Venezuela-in Colombia nena inzawmna titawp

Venezuela President Nicolas Maduro-a chuan kar kalta Inrinni khan an ram ṭhenawm, Colombia nena diplomatic leh political lama inzawmna an neihte chu tihtawp a nih thu a sawi a, hei hi Colombia-in Venezuela eptu hruaitu a thlawp vang a ni. 

Venezuela khawpui, Caracas-a Maduro-a kaihhruai sorkar thlawp-tuten kawngzawh an huaihawta thu a sawiah, President chuan Colombia sorkar nena inzawmna an neih reng reng chu tihtawp vek a nih thu a puang a, Colombia embasy staff-te pawh darkar 24 chhunga an ram chhuahsan turin a hriattir nghal bawk. 

Colombia President Ivan Duque chuan Venezuela eptu pawlte an thlawp thu a sawi fo a, Maduro-a kaihhruai sorkar chu na takin a sawisel fo bawk. 

Maduro-a chuan, "Kan dawh-theihnain a tlin ta lo. Venezuela beihna atana Colombia ram hman fo chu kan thlir liam reng thei tawh dawn lo a ni," a ti. Hetianga thutlukna hi siam lo thei loin Colombia sorkar chuan a nawr niin a sawi. Colombia nena an inzawmna neihte a chhutchah vek chhan chu Charter of the United Nations resolution te palzut a nih vang a nih thu a sawi bawk. 

Venezuela sorkarin an inzawmna a tihtawp thu a puan hnu hian Colombia sorkar chuan Venezuela-a an ram official awmte chu a ko haw ve nghal a ni. Colombia foreign ministry chuan thuchhuah siamin, "Colombia sorkar chuan Maduro chu a pawm lo a, acting president Juan Guaido chu a pawm zawk a ni. Guaido-a'n Colombia official-te Venezuela rama awm chhunzawm tura a sawm avangin a chungah pawh kan lawm hle a ni", a ti. Mahse Colombia official-te himna atan hian a rang thei anga ber koh  kir chu a ṭha zawka an ngaih thu a sawi. 

US leh a thurualpui ramdangten Venezuela eptu pawlte nena thawkhoin chhawmdawlna thawnluh an tum thu an puan hnuah, Venezuela chuan Colombia leh Brazil nena an ramri te a lo khar tawh bawk a ni. 

Hetihlai hian US chhawmdawlna thawn, Colombia ramri bula Venezuela sipaiten an dan chu lakluh phutin Inrinni khan ramri bul khuaah mi tam takin lungawi lohna an lantir a, mipui pungkhawmte hi sipaite chuan tear gas-a an phuh bakah rubber bullet te pawh an kapchhuak bawk. Hei vang hian mi eng emaw zatin hliam an tuar a ni.