US President Trump-an 'National Emergency' a puang Democrats lamin court-ah khin let tum
US President Donald Trump chuan an ram chhim lama US-Mexico border-ah kar kalta Zirtawpi khan national emerengy a puang ta. Hei hi Democrats lam chuan nasa takin an sawisel nghal a, dan loa thuneihna lekkawhna a ni, tiin court-ah khin let an tum.
President Trump-an kum 2016 inthlan dawna a campaign-naa a lo tiam tawh, Mexico ramri hungna siamna tura a sum phut ang chu Democrats lamin an pawmpui thei lo a, Congress-a spending bill an pass-ah a sum duh zat ang an pass sak duh loh avangin national emergency hi a puang ta a ni. Democrats lamin ramri hungna tur sum pek an remtih loh vang hian ni 35 chhung zet US sorkar chu khar, shutdown a lo nih phah tawh bawk.
National emergency a puan tak avangin President hian ramri hungna siamna tur sum hi Congress pawmpuina ngai loin a hmu thei dawn a, hei bakah hian sipaite pawh a chhawr thei dawn a ni. Trump chuan ramri kaltlang hian an ramah ruihhlo nasa taka tawlhluh a nih bakah, misual pawl hrang hrang leh mihringa sumdawng ṭhinte an lut a, hei vang hian ramri himna hi ngaih pawimawh a ngai tih a sawi. A thupek tihchhuah chu an khin let ngei a rin thu a sawi a, hemi rual hian khing let mah se hnehna a chang dawn tho niin a sawi.
Trump hian Mexico ramri, km 3,200-a thui hungna bang siamna tur hian US dollar tluklehdingawn 5.7 a dil a, mahse Congress chuan bang siamna ni lo, a hungna tura atana hman turin dollar tluklehdingan 1.375 chauh pek a remti a ni.
National Emergencies Act hnuaiah president hian national emergency a puang thei a, mahse a puan chhan ṭha tawk a nei tur a ni. He dan hi hman a nih chuan White House chuan martial law a puang thei dawn bawk a, sipai thuneihna pek belhin, sumdawnna, communication leh financial transaction thlengin a khuahkhirh zui thei dawn a ni.
Democrats lam chuan President-in national emergency a puan chu dan loa chetna a ni tiin court-ah leh Congress-ah khin let an tum tih an sawi. House of Representative Speaker Nancy Pelosi leh Democratic Senator Chuck Schumer-te chuan thuchhuah inṭawm siamin, President thiltih dan chu a thuneihna lulinna a ni tiin, dan piah lama cheah an puh. Congress chuan an ram danpui thuneihna chu humhim tumin a bei zel dawn a ni, an ti.
President Trump-a thupek tihchhuah hi non-profit advocacy group, Public Citizen chuan Washington DC court-ah a khing let nghal. Court-a petition an thehluhah President-in emergency a puang chu legislative authority bawhchhiatna leh dan kalh niin an sawi a, ramri hungna bang siamna tura defence department budget a hman tur pawh dansak turin an phut.