Haiti tan-in aṭangin mi 78 tlanchhuak

Haiti ram chhim lam, Aquin-a tan-in aṭangin Thawhlehni chhun khan tang 78 an tlanchhuak. 

National police thu­puangtu chuan Thawh-lehni-a an rama khawpui hrang hranga President Jovenel Mosie ban phuta nawrh huaihawt a nih laiin tangte hi an tlanchhuak niin a sawi. An tlanchhuah theih dan tak hi sawichian a ni lo. 

Thawhlehni-a Haiti khawpui, Port-au-Prince-a nawrh huaihawtte leh police te inkarah buaina nasa tak a chhuak bawk a, mipui pungkhawmte hian car-te an hal bakah dawrte an rawk bawk. Presidential palace bulah mi pakhat kahhlum a ni. Mipui lungawi lote hian an rama eirukna nasat avanga mipuite dinhmun inthlau chak lutuk chu an duh loh thu an sawi a, hmasawnna hna thawhna tur sum tihchingpen nia sawi chungchangah President chu insawifiah turin an phut. 

February 7 aṭang khan President laka lungawi lohna lantira nawrh huaihawtna hi neih ṭan a ni a, nawrh chhunzawm zel a nih avangin US State Department chuan Haiti rama American embassy-a thawk fate chu Haiti chhuahsan turin a hriattir tawh bawk.