Eptute nena inbe turin kan inpeih : Venezuela FM

Venezuela Foreign Minister Jorge Arreaza chuan President Nicolas Maduro-a kaihhruai sorkar chuan an ram politics  buaina thleng mek chinfel dan kawng zawnga eptu lamte inbiakna neihpui a inpeih tih a sawi a, hemi rual hian intiamkamna tel loa inbiakna hi neih an duh tih a sawi. 

New York-a UN Headquarters-a chanchinthar lakhawmtute a kawmnaah Arreaza chuan, "Engvangin nge Venezuela mite inkara intiamkamna siam kher a ngaih ang? Sorkar chuan rilru inpawh tawn taka inbiakna neih hi a duh a ni. Ram danpui kan nei alawm. Hei vang hian intiamkamna leh thildanga inphuarbeh tir kher loa buaina chinfel dan kawng kan zawn a ngai a ni", a ti. Eptu lamin inbiak ṭan hma aṭanga intiamkamna an phut tlat a nih chuan inbiakna kawng a tibuai thei dawn tih a sawi. 

Eptute chu US sorkarin a thununna lak aṭanga inlakchhuah a ngai a, hemi hnuah hian ram danpui zulzuiin inremna siamin, Venezuela buaina chinfelna tur chu an siam thei dawn niin Arreaza chuan a sawi. 

Kumin January 23-a National Assemby Preident Juan Guaido-an an ram acting president-a a inpuan hnu khan Venezuela tualchhung politics buaina a thleng zui a ni. US bakah ram dang eng emaw zatin Guaido hi Venezuela ram hruaitu atan hian an pawm a ni. 

Russia chuan Venezuela buaina chinfelna tura sorkar leh eptu pawl aiawhten inbiakna an neih theihna tura buaipui a inhuam thu a sawi a, hemi rual hian US sorkar chu Venezuela sorkar inrelbawlnaa inrawlh lo turin a ti zui nghal bawk.