Mexican drug lord El Chapo thiam loh chantir
US-a New York federal court chuan Mexican drug lord, Joaquin 'El Chapo' Guzman chu a thubuai 10-ah thiam loh a chan tir.
Kum 61 mi, Guzman hi ruihhlo tawlhru ṭhin pawl lian tak, Sinaloa drug cartel hotu a ni a, cocaine leh heroin tawlhruk, dan kalha ralthuam kawl leh dik lo taka pawisa thawn kuala puhna thubuaite siamsak a ni. Thiam loh chantir ni mah se court hian a hremna tur a la puang lo a, damchhung lung-in tang tura hrem a nih rin a ni.
Mexico tan-ina a ṭan laiin Guzman hi tan-in hnuaia leiverh aṭangin a tlanchhuak a, mahse a tlanchhuah hnu thla nga, kum 2016 January thlaah man a ni leh tho a ni. Kum 2017 khan US sorkar ngenna angin US-ah a thubuai hmachhawn turin thawn a ni. Kar 11 chhung zet a thubuai hrang hrangte hi ngaihtuah a ni a, hemi chhung hian thuhretu 50 chuang koh an ni.
US-a ruihhlo tawlhru ṭhin zinga lian ber, Guzman hi kum 2009 khan Forbes in khawvela mi hausa list a siamah 701-na a ni pha a, a hausakna hi US dollar tluklehdingawn khat hu-a chhut a ni. US-a ruihhlo chi hrang hrang cocaine, heroin, metthampehtamine leh marijuana thawn lut leh a siamna kawngah puia puh a ni a, hei bakah hian tualthat, nghaisak leh mi rubo tura midang chhawr ṭhinah puh a ni bawk. Hmeichhe eng emaw zat hrairui a, pawngsualah puh a ni tel bawk.