Pakistan PM hlui zinchhuak tur dang

Pakistan Prime Minister hlui Yousuf Raza Gilani chu Thawhlehni zan khan Lahore airport-ah security official-ten ranpawna a zin tum chu an lo dang. 

Federal Investigation Agency chuan Gilani hian South Korea kaltlangin Bangkok-a conference hmang tura kal tumin Lahore-a Allama Iqbal International Airport-ah a kal a, mahse security official ten an lo man tih a sawi. Gilani hi sorkarin ram pawna zinchhuah a khap a, official a hrek zingah a tel a ni.  

FIA chuan immigration counter-ah Gilani hi blacklist-ah telh a nih thu leh, Pakistan ram a chhuahsan theih loh thu hrilh a ni tih a sawi a, hei hi interior ministry thupek anga ti an nih thu a sawi bawk.

Pakistan Peoples Party (PPP) hruaitu Gilani chuan rampawna kal khapsak, no-fly list-a telh a nihna chhan tur a awm lo tih sawiin, an ram aṭanga tlanchhiat pawh a tum lo tih a sawi. He thil hi Pakistan Prime Minister thar Imran Khan-an politics lama a elpuite a beihna pakhat a ni, a ti. Rorellai, Pakistan Tehreek-e-Insaf (PTI) sorkar cuan blacklist-a telh a ni tih chu a hrilh tur a ni tiin, sorkar thiltih dan chu khin let a tum thu a sawi. 

Gilani hian eiruk thubuai eng emaw zat a nei mek a, heng zingah hian  Public Procurement Regulatory Authority (PPRA) rules palzuta dan kalha Messrs Midas hnena advertising contract pe puhna pawh a tel. He a thiltih vang hian sorkarin dollar matkaduai  129.07 zet a hloh phah nia sawi a ni.