Saudi oil plant beituah Iran puh

Saudi Arabia-a sorkar company Aramco oil plant pahnih chu  September 14 khan drone hmanga beih a ni a, Yemen-a Houthi helten an tih a nih thu sawi mah se Germany, UK, France-te chuan Iran tih a nih thu an thuchhuahah an tarlang. 

Kum 2015 khan "Iran nuclear deal" chu heng ram pathum Germany, UK leh France-te hian Iran an lo ziahpui tawh a. Anni bakah United States, Russia, China leh European Union-te an ziak bawk a ni. Mahse nikum khan US chu he inremna siam aṭang hian a inhnukdawk tawh. Thawhṭanni khan Britain prime minister Boris Johnson pawhin nuclear deal aṭang hian an inhnuhdawh ve dawn thu a sawi.   

Boris Johnson chuan Thawhṭanni khan France President Emmanuel Macron leh Germany Chancellor Angela Merkel-te chu UN General Assembly New York-a neih mekah hmuin, Iran chungchang hi an sawiho a ni. Heng ram pathum Germany, UK, France-te chuan, Saudi oil facility beitu hi Iran a ni tih hi a chiang thawhkhat a ni, tiin thuchhuah an siam ah an tarlang. 

Middle East-a innghirnghona awm ṭhin hi tih ziaawm a nih theih nan  ram pathum hotute hian an hmalak dan tur an sawi ho bawk a, ramdangte tibuai lo zawnga khawsa turin Iran chu an duhthu an sawi bawk. Ram dangin an puhna hi Iran army Major General Mohammad Baqeri chuan chhang letin, Saudi oil plant beitu an nih loh thu a sawi a, "Iran an bei a nih chuan a beitute kan hneh zel dawn a ni," a ti ve thung. Iran Foreign Minister Javad Zarif chuan Saudi oil plant beitu an nih thu Yemen Houthi helten an sawi chu a dik a ni a ti. Ramdangin Iran an puhchhiatna kara Iran President Hassan Rouhani chu New York-a UN General Assembly hmang tura a kal hi, Iran tih loh tawp tur a nih thu Zarif chuan a sawi bawk.