Myanmar-in infrastructure project atan loan USD tld khat la dawn
Myanmar sorkar chuan an ram chhunga infrastructure project thawhna atan South Korea aṭangin loan, US dollar tluklehdingawn khat a la dawn.
Myanmar rama South Korea president Moon Jae-in a cham lai, kar kal ta khan economic development cooperation fund (EDCF) atana sum pukna tur inremna hi an ziak a ni. He inremnaah hian Union Myanmar Minister for Investment and Foreign Economic Relations U Thaung Tun leh South Korea Minister for Foreign Affairs Ms Kang Kyung-wha-ten hming an ziak a ni.
Ministry of Investment and Foreign Economic Relations chuan loan lak hmang hian project pakua thawh a ni dawn tih a sawi. Ministry of Agriculture, Livestock, and Irrigation chuan agricultural institute tihchangtlunna turin USD maktaduai 57 an dawng dawn a, hemi hmang hian vocational and educational programme-te buatsaih a ni ang a, agricultural cooperative scoiety-te tichangtlungin, rural cooperative member-te sum lakluh tihpun dante ngaihtuah pui an ni ang. Hei bakah hian Ayeyarwaddy Delta Area Development Programme siam a ni dawn bawk.
Ministry of Transport and Communication (MOTC) chuan e-government integrated data center project atan USD mtd 93 a dawng dawn a, railway modernisation project atan USD mtd 45 leh Mandalay-Myuitkyina rail line project atan USD mtd 700 dah a ni ang.
Transmission line leh substation project atan Ministry of Electricity and Energy hnenah USD mtd 50 pek niin, transmission lam tihchakna atan USD mtd 79 pek a ni dawn bawk. Ministry of Construction chu power, water leh road infrastructure project atan USD mtd 60 pek a ni ang a, Myanmar – Korea Friendship Dala Bridge siamna turin USD mtd 20 leh Watayar Bridge construction project atan USD mtd 79 dah a ni bawk ang.