Baghdad-ah Tiam chin awm loin curfew puang

Iraq sorkar chuan an ram khawpui, Baghdad-ah ni hnih chhung nawrh huaihawt a nih hnuin nimin khan tiam chin awm loin curfew a puang. Nawrh huaihawtnaa buaina chhuakah hian mi 13 an thi a, mi za telin hliam an tuar bawk. 

Thawhlehni aṭang khan Baghdad-ah hian unemployment leh eiruk chungchang avanga prime minister Adel Abdul Mahdi kaihhruai sorkar laka lungawi lohna lantirin nawrh an huaihawt a ni. Nawrh huaihawtnaah hian tharum a chhuak zui a, nimin thleng khan tharum thawhna thlenga thi zat hi mi 13 an tling tawh. Nawrh huaihawt zinga mi paruk leh police pakhat chu khahlum an ni. 

Buaina a punlun chhoh zel avangin nimin khan sorkar chuan Baghdad khawpuiah curfew a puang ta a ni. Prime Minister chuan zing dar 5 atangin mipui punkhawm bakah, motor tlanchhuah pawh khap a nih thu a sawi. Hriattirna tihchhuah a nih leh hma chuan curfew hi hman chhunzawm a nih tur thu a sawi bawk. 

PM chuan province-a curfew puan leh puan loh tur chungchang erawh provincial govenor-te kutah a awm tih a sawi. Nawrh huaihuatnaa a bul tumtu ber chu Shia leader Muqtala al-Sadr a ni a, a party Saeroon chu ṭangrual sorkarah an tel mek a ni. Nawrh huaihawtnaa tel tam ber hi ṭhalai, political party leh sakhaw party lama inhnamhnawih lote an ni.