Egypt-ah ṭawih thei loa siam ramsa leh milim eng emaw zat hmuchhuak

Egypt ram khawpui Cairo bula Giza province-a Saqqara necropolis chhungah kum 2,700 liam ta vela ramsa ṭawih thei loa siam (mummified) leh ramsa lim eng emaw zat an hmuchhuak tih Egyptian Ministry of Antiqui-ties chuan Inrinni liam ta khan an puang.

Ministry Supreme Council of Antiquities (SCA) head Mostafa Waziri chuan an thil hmuhchhuah thar zingah hian sakeibaknei note, zawhte, awle leh mongoose eng emaw zat ṭawih thei loa siam chu Saqqara-a ramsa thlanah thingrem 25-a dahṭhat chu an hmuchhuak tih a sawi a, hieroglyphic texts eng emaw zat a awm tel tih a sawi bawk. 

SCA archeological mission thil hmuhchhuah zingah hian zawhte lim 75- hmasang Egypt zawhte pathiannu Bastet entirna, thinga siam an pathiannu Neith, Osiris-a lim bronze-a siam 57 leh Horus limte a tel a ni. An thil hmuhchhuahte hi hmasang Egypt 26th Dynasty hunlaia mi nia sawi niin, thingrem chhunga an hmuhchhuah  'stone scarab' pakhat phei chu an hmuhchhuah tawh zinga lian ber a ni tih Waziri chuan a sawi.

Egyptian Minister of Antiquities Khaled al-Anany chuan an thil hmuhchhuah chu thil hmuhchhuah satliah mai ni lo, museum tawp a ang zawk ti hialin a sawi ve bawk.