Kenya rama leitawlhah mi 36 thi

Africa khawchhak lama awm Kenya hmarthlang lam, West Pokot County-ah ruahsur nasa avanga lei­tawlhin mi 36 a hnawl hlum. Thi zingah hian naupang pasarih an tel bawk.

Uganda ram nena an inrina bul, West Pokot County-ah hian kar kal ta Zirtawpni khan ruah nasa takin a sur a, hei vang hian tuilian leh leitawlh nasa tak a thlen phah a ni. Tuilian hian lei dawh pali a hnawl a, Muino khua chu tlawhpawh theih lohin a awm bawk a ni. 

Leitawlh hian inkal pawhna kawng a tihchhiat nual avang hian chhanchhuah hna hi thawk lawk theih a ni lo. Kenyan President Uhuru Kenyatta chuan chhiat tawk chhungte hnenah a tawrhpui thu a sawi a, chhanchhuah hna hi sipaite leh police-te chuan an thawh mek thu a sawi. 

Kenya meteorological department chuan Indian Ocean "El Niño" vanga ruahsur nasa leh tuilian a thlen mai theih thu sawiin, November 18 khan mipuite hnenah inralring tura hriat­tirna a tichhuak tawh a ni. Kum 2018 April thla khan Kenya ramah hian leitawlh vangin mi 100 bawr velin nunna an lo chan tawh a, mi 1000 chuang hmun dangah an pem phah a ni.