Mike Pence-a'n Iraq-a US sipaite tlawh

United States Vice Pre­sident Mike Pence chuan puangzar lawk loin Iraq thlang lama Anbar province-a al-Asad airbase-a US sipaite chu kar kal ta Inrinni khan a tlawh.

Mike Pence hian Iraq a tlawh vawikhatna a ni a, nawrh huaihawt avanga buaina chhuak mek avangin Iraq khawpui Baghdad erawh tlawh phalsak a ni lo thung. A zin chhung hian Iraqi prime minister Adel Abdul Mahdi nen inhmu thei lo mah se phone call hmangin, oil chungchanga Iraq-in harsatna a neih mekte leh US leh Iraq-in inlaichinna ṭha an neih theihna turte an sawi dun. 

Pence leh Abdul Mahdi-te hian Iraq ramin economy lama harsatna a tawh mek chungchangte pawh an sawi dun a, Iraq mipuite thil phut inthlan ṭhatna neihte pawh an sawi dun a ni. Abdul Mahdi chuan Iraq sipaite'n nawrh huaihawtte hnawhdarh nan ralthuam an hman dawn lo thu Pence hi a lo hrilh bawk. Anbar province-a Iraq Kurdish President Nechirvan Barzani pawh Pence hian a hmu bawk a ni. 

Iraq mipuite hian hna leh vang­tlang tana hamṭhatna ngaihtuah sak lohah sorkar hi puhin hun rei tak chu lungawi lohna an lo lantir tawh a ni. Electric leh tui mumal loh avang leh economy a tlakchhiat mai bakah, eirukna a hluar em avangin mipuite hian sorkar hi bang turin an phut a, inthlan ṭhat neih an rawt bawk. 

October thla tir aṭang khan sorkar laka lungawi lohna liamtham lantir hi neih ṭan niin an la nuar chhunzawm reng a, nawrh huaihawtna ṭhenkhatah chuan tharum thawhna pawh a chhuak fo a ni. Tharum thawhna chhuaka hi mi 325 an tling tawh a, mi 15,000 velin hliam an tuar tawh bawk.