Israel-in malware attack lo dang thei

Israel sipai thupuangtu, Lieutenant Colonel Jonathan Conricus chuan Palestinian firfiak pawl, Hamas-ten hmeichhe thlalak hmanga an sipaite mobile phone beih an tumna chu Pathianni khan an lo dang tih a sawi. 

Conricus chuan sipaite mobile beih tuma Hamas-te ruahmanna siam hian sipai tlem azawng phone chu khawih hman mah se, thil pawi tham thleng a awm lo tih a sawi. Hei hi kum li chhunga Hamas-ten malware attack an tum ṭum thumna a nih thu a sawi bawk. Sipai thupuangtu chuan Hamas hian cyber-warfare lama an beihnaah hma an sawn zel nia sawiin, hmeichhe hmel-ṭha tak hnen aṭanga thawn ni awm takin sipaite number-ah hian message-te thawn a nih thu a tarlang. Hetiang thil hi a hmain Hamas-te hian a la hmang ngai lo tih an sawi. 

Message-ah hian thlalak awlsam taka inpek theihna tur nia sawi, application download tur link pek tel an ni. Heng apps tarlan hi Catch & See, ZatuApp leh GrixyApp tih a nih thu Israel sipaite chuan sawiin, hei hi an install chuan Hamas-te hian an phone device chu awlsam takin an rawn ensak thei tawh dawn a ni.