
Israel Parliament-in Knesset Speaker atan Matan Kahana thlang
Israel Parliament chuan Thawhlehni khan Knesset speaker atan Matan Kahana an thlang. Vote laknaah member 120 awmna House-a member 66 in an vote a, Jewish kaihhruai eptu party leh Arab party-ten an thlawp a ni. Rorellai, prime minsiter Benjamin Netanyahu kaihhruai ṭangrual pawl candidate, Ofir Katz chuan vote 52 a hmu.
Knesset Speaker thlan thar Kahana hi president Isaac Herzog-a'n sorkar thar siam tura a sawm, eptu ṭangrual pawl hruaitu Gadi Eisenkot thawhpui ṭha tak a ni. Eisenkot hian sorkar thar siam tura member mamawh zat a la nei tling lo a, mahse, speaker atana Kahana thlan tlin a ni leh hian sorkar a siam theihna tur kawngah a puih hle rin a ni.
Israel parliament speaker dinhmun hi a pawimawh hle a, parliament hna thawhna hun ruahmanna siamtu a nih avangin dan siam tura rawtna neih chungchangte a tichakin, a tikhawtlai thei bawk. Katana chuan thlan tlin a nih hnua thu a sawiah mitin tan, sakhua leh nihna engmah thliar loin Knesset speaker a ni dawn tih a sawi.
Kum 54 mi, Kahana hi Israel Defence Forces (IDF) officer hlui a ni a, New Right party-ah a awm ṭhin a, mahse kum 2025 September thla khan Eisenkot-a party Yashar party a zawm a ni. Kum 2021-2022 khan minister of religious service a ni a, Chief Rabbinate thuneihna tihtlem sak a tum avangin ultra-Orthodox Jews nen pawh an lo intihbuai phah tawh a ni.
Eisenkot chuan speaker thar Kahana chu a lawmpui thu sawiin, a kaihhruaina hnuaiah Knesset-ah chuan mipui aiawh pawl hrang hrangte chu ang khat veka enin, an thu leh hla pawh ngaihthlak sak an ni thei dawn a ni, a ti. Hetih lai hian PM Netanyahu chuan speaker thar chu sawiselin, firfiak thlawptute puihna hmanga thlan tlin a ni tiin Arab party-ten an Katana an thlawp chu a sawi zui a, Knesst chanchina thil thleng duhawm lo tak a nih thu a sawi.