Italy-in Meta USD mtd 805 chawi turin ti

Italy rama data venhimna lam thawktu, Garante chuan American multinational technology company, Facebook neitu ni bawk Meta chu Android user-te gallery-a an thlalak leh video-te phalna nei loa ensakah puhin, USD mtd 805 chawi turin a ti. Meta chuan hei hi appeal an tum thu an sawi.

Meta hian an social media platform pakhat, Facebook-ah kum 2023 aṭang khan "Get suggestions from your gallery while browsing Facebook" tih an siam a, hemi hmang hian gallery-a thlalak leh video-te chu scan in, an thlalak thlante chu post theih a ni. Mahse, Grande chuan complaint dawngin, Android phone hmangtute chuan Facebook Android app hi an thlalak leh video-te an phalna loa la lutah an puh a ni. Grande chuan hei hi Italy Privay Code-a Article 122 bawhchhiatna a ni tiin, device-a information dahte venhimna dan bawhchhiaah Meta hi a puh. He thil hian Italy-a Android user mi mtd 20 vel a nghawng thei tih sawiin, sum tam tak chawi turin a ti ta a ni. He feature hi off turin a ti bawk a, feature chungchang - gallery-a information a hmuh theih dan leh phone aṭanga feature tihtawp a nih theih dante chiang taka sawifiah turin a hriattir bawk.

Dan bawhchhiaa puh an nih chungchang chu Meta chuan sawifiah nghalin, feature chu dik leh tlang taka kalpui a nih thu a sawi. "He feature hi Facebook-a thlalak leh video post-na tura puihna tura duan a ni. A hmangtu chuan an phone-a hman a nih dawnin phalna pawh an pek a ngai a, an setting kaltlangin an duh hunah an thlak danglam leh thei vek a ni," a ti.