DR Congo-a Ebola hri leng la thunun thei lo

Democratic Republic of Congo (DR Congo) rama kumin May thlaa Ebola hri a len thu puan a ni a, hri leng puan a nih aṭanga thla ruk hnuah pawh an la thunun thei lo. Hri darh zel tur venna kawnga hmalaknate pawh ala hlawhchham zel a ni. Hri kai hmuh chhuah tawh zingah a zahve dawnin an thihpui tawh a ni.

Tun ṭuma DR Congo rama Ebola hri leng hi a len ṭum 17-na leh, a nasaat ber ṭum nia sawi a ni. Kum 2014 leh 2016 inkara hri leng vangin mi 11,000 vel an thih phahna aiin, tun ṭuma hri leng vanga thi hi an tam dawn niin an chhut.

Hri darh zel tur dan beh tuma hmalakna, hri kai nena inhnaih te chhui zui (contact tracing) leh a hrana dah (isolation) te chu a la tawk lo hle. Mithiamte chuan kum khat chhungin hri leng hi an thunun thei dawn lo niin an ngai.

May thla laihawla Ebola hrileng puan a nih khan, mi 43 in he hri hi an thihpui tawh tih an sawi. Hei vang hian hri a leng tih puan a nih hma aṭangin hri hi a darh tawh a ni. Ram chhunga province 26 zinga province pariatah hri hi a darh a, aid groups-te chuan ram kang nasa tak ang maiin hri hi a darh zel niin an sawi. Hri leng hluarna thar a awm belh zel a ni.

Africa Centres for Disease Control and Prevention-in a tarlan danin, hri kai thar zingah 80% hi damdawi lam thawktute an enfiahna pawn lam a ni. Hri vanga thi zinga hmun thuma ṭhena hmun khat hi mahni ina inenkawl te niin, mitthi sawngbawl leh phum dan pawh uluk taka enfiah a ni lo a, hei hian hri darh zel theihna pawh a tisang hle bawk.

Healthcare system lam a chak tawk lo a, thawktu leh hmanrua an indaih lo a, fund an dawn ṭhat lo bawk avangin hri leng mek karah healthcare worker-ten hlawh an lak ṭhat theih loh avangin a khat tawkin nawrh an huaihawt fo bawk. Hei vang hian hri kai hmuh chhuah tam tak chu enkawlna dawng mumal loin an awm a ni.

UNICEF chuan naupang, a bikin ei tur ṭha ei pha lote tan hri hi an kai nasa zual tih an sawi. November 4 thleng khan hri vanga thi zinga 35% chu naupang an nih thu sawiin, kum 5 hnuai lam chu 21% an tling tih an tarlang.