Document dik lo hmanga puh Indonesia Vice President a bang

Indonesia vice president Gibran Rakabuming Raka chu Supreme Court-in 2024 inthlan dawna a high school document theh luh chu a pawm tlak a ni lo tih a sawi hnuah, nimin kha Vice President a nihna aṭanga banna a theh lut.

Kum 39 mi, Raka hi president hlui Joko Widodo fapa a ni. Nimin khan an rama rorelna sang, People's Consultative Assembly-ah a banna hi a theh lut a ni. A thlaktu tur hi president-in mi pahnih nominate-in ni 60 chhung Assembly hian an thlang dawn a ni.

Raka hian Singapore leh Australia-ah lehkha a zir ṭhin a, a lehkha zirna thiamna educational credential tihlanna tur hian Indonesia rama a tlukpui certificate a hmang a ni. Indonesia ram danah vice president hian zirna lamah senior secondary emaw, a tlukpui emaw a zir chhuak ngei tur tih a ni. Mahse, Supreme Court chuan Raka hi ram dangah lehkha a zirnaah a graduate ngei em tih finfiahna a awm lo tih a sawi. Hetih lai hian university-a zir chuan senor high school a zo tih a tichiang niin a sawi thung.

Supreme Court-in a high school document theh luh a pawm tak loh avangin, Raka hi MP 100 in an thlawp chuan Parliament-ah paihthlak a nih theihna tura hma lak theih a ni. Mahse, hei hi an kalpui hmain banna hi a theh lut ta a ni.