Iran-in a vau vangin US Treasury hotu Bessent military base-ah sawn

US Treasury secretary Scott Bessent chu Iran-in a vau avangin, a nun atana hlauthawmawm a awm avangin Washington DC-a a chenna in aṭangin sipai hmun, military base-ah a insawn.

Senior intelligence official-in a tarlan danin, Iran hian US mi leh sate leh thawktute laka tharum thawha tihhlum tura ruahmanna an siam chu hma an la chho zel a ni. The New York Times chuan military base-a Bessent insawn thu hi a report hmasa ber a, mahse, Iran lak aṭang hian eng ang vauna chiah nge a dawn tih erawh a sawichiang lo.

Bessent hi Strait of Hormuz hawn a nih leh theihna tur leh, he tuipui kawnga lawnga kalte Iran-in a beih ṭhin tihtawpna tura US-in Iran sum leh pai dinhmun tihchiatna tura August thlaa beihpui a thlakna, Operation Economic Outcast tih hnuaia Iran hrekna tur hrang hranga siama kaihruaitu a ni. Hrekna an siam zingah hian Iran-in an ram pawn lama bank branch an neih hrang hrangte khawih chet theih loa siam bakah, Iran hnena sum thawn ṭhin financial service firm-te pawh hrek tel an ni bawk.

US Treasury thupuangtu chuan Bessent hian Iran sorkar vauna avang hian a thiltih chu a bansan dawn lo a, Operation Economic Outcast chu hlenchhuah a nihna turin a hna a chhunzawm zel dawn tih a sawi.