Israel Parliament member thlan tharte la lut
Israel parliament inthlanpui, October 27-a neiha member thlan tharte chu Thawhlehni khan lak luh an ni a, hetih lai hian sorkar thar erawh a la ding lo.
Eptu ṭangrual pawl hruaitu, Gadi Eisenkot chu sorkar thar siam turin Pathianni khan president Isaac Herzog chuan a sawm a, mahse, ṭangrual pawl hian sorkar siam tura member ngai zat an neih tlin loh avangin thawhpui tur dang an zawn a ngai a ni. Nimina Parliament member tharte lak luhnaah president Herzog chuan member-te chu sorkar thar siam a nih theih ngeina tura an theihtawp chhuah turin a chah a, "In elpuite pawh nise, thawhpuia inpumkhat dan ngaihtuah rawh u. Ṭhahnemngai leh ngilnei takin indawr tawn ula. Knesset-ah hian thawh tur hna tam tak a awm," tiin a chah. Sorkar thar siam tura party-te an thawh ho theih loh chuan, inthlanpui hi neih leh a ngai dawn a ni.
Prime minister Benjamin Netanyahu chu ṭangrual sorkar thar a din hma chu caretaker prime minister a ni chhunzawm rih ang. A party, Likud party leh an thawhpui, ultra-Orthodox party dangte chu tun ṭum inthlanah hian rinlawk aiin an che ṭha a, mahse seat 53 lain majority erawh an nei pha lo.
Sorkar thar siam la ni lo mah se, Parliament lak luh thar hian Eisenkot-a campaign laia a lo tiam tawhte a kalpui thei dawn tho a ni. Heng zingah hian October 7, 2023-a Hamas firfiakten Israel an beih chungchang chhuitu tur commission din pawh a tel. Hei hi Arab party lam pawhin an thlawp a ni. Eisenkot hian Knesset speaker ni mek, Likud party member chu a thlak thei bawk ang.
Eisenkot hian December 6 thleng sorkar thar siam turin hun a nei dawn a, hei bakah kar hnih dang pawhsei a la dil thei dawn bawk a ni. Hemi chhunga sorkar siam tura member mamawh zat, member 61 thlawpna a hmu thei lo a nih chuan, President-in Netanyahu chu ṭangrual sorkar siam turin a sawm ve leh ang. Ani pawhin a thei lo a nih chuan, Parliament member zinga pakhat chu sawm a ni ve leh ang a, ani pawhin thlawptu mamawh zat ang a nei thei lo leh a nih chuan inthlanpui hi neih ṭhat leh a ngai dawn a ni.