Russia, Ukraine leh US palaite inbia

Russia leh Ukraine indona thleng mek tihtawp a nih theihna tura inremna siam dan ngaihtuahin Russia, Ukraine leh US palaite chu nimin kha UAE khawpui, Abu Dhabi-ah an inbia.

Abu Dhabi-a inbiakna an neih hi kumina an inbiak ṭum thumna niin, January leh February thla khan ram pathum aiawhte hi an lo inbe tawh bawk a ni. Nimina inbiaknaah hian US aiawhin president Donald Trump-a special envoy - Steve Witkoff leh Jared Kushner te an tel a, Russia palaite hi president Vladimir Putin aiawh Vladimir Medinsky-a'n a ho a, Ukraine palaite hi foreign intelligence service hotu Rustem Umerov-a'n a ho a ni.

Ram pathum aiawhte inbiaknaa inremna a awm theihna atana US-in rawtna a siamah, Russia leh Europe inkara venhimna ṭha siam turte pawh a telha ni. Hei vang hian inbiakna an neih zawhah, European Union leh Germany, France, UK leh Italy palaite chuan Russia leh Europe inkarah hma lama huna harsatna thleng thei chinfel leh, inlaichinna ṭha siam a, venhimna ṭha zawk siam dan tur ngaihtuahin US palaite hi an hmu dawn bawk. EU palai, Kajal Kallas chuan Europe lam hian venhimna siam dawn tura ruahmanna pawh an nei sa niin Thawhṭannia G7 foreign ministers meeting neihah a lo sawi tawh a ni.