World Court-in Nov 19-ah Myanmar chungchangah thutlukna puang dawn

International Court of Justice (ICJ) chuan November 19 hian Rohingya Muslim te chunga a chet danah Myanmar sorkar chuan UN Genocide Convention a bawhchhia em tih chungchangah a thutlukna a puang tawh dawn.

He thubuai hi kum 2019-ah Gambia in a theh luh a ni a, hun rei tak ngaihtuah a nih hnuah November 10 chawhma hian The Hague, Netherland-ah ICJ hian thutawp a siam tawh dawn a ni. Gambia-in thubuai a theh luhah hian Myanmar chu an sipaiten Rohingya Muslim-te laka beihpui an thlak danah Prevention and Punishment of the Crime of Genocide chungchanga 1948 Convention kaihhruaina siam a bawhchhia niin a puh a ni.

Rohingya hi Myanmar-ah hian minority niin, kum 2017 August thlaa Myanmar sipaiten Rohingya ho chenna, Rakhine state-a beihpui a thlak avangin mi nuai 7 vel chu an tlanchhia a, an zinga a tam ber chu Bangladesh ramah tlanchhiain, tun thlengin mi nuai tel chu raltlanin an la awm chhunzawm.

United Nations chuan Rohingya-te chu khawvela hmuhsit leh tihduhdah hlawh ber an ni tiin a lo sawi tawh a, Ontario International Development Agency report chuan Myanmar sipaite kut tuarin mi sing tel an thi nia ngaih an nih thu a tarlang bawk.