Bolsonaro party-in Lula chak an pawm

Brazil president thar thlanna neih zawh takah president nilai, Luiz Inacio Lula da Silva chu thlan tlin a ni a, a khingpui senator Flavio Bolsonaro chuan inthlan result hi hnawl tura a phut thu a sawi. Mahse, a party Liberal Party chuan Lula chak hi an pawm thu thuchhuah siamin an tarlang.

Pathiannia president thlan thawh hnihna neihah Lula leh Bolsonaro te hi inhmachhawnin, Lula hian vote mtd 4.4 vela hmu tamin a chak zawk a ni. Inthlan result puan a nih hnuah, Bolsonaro chuan Lula chak chu a pawm loh thu leh, vote thlak hun darkar hniha pawhsei a nih chungchang sawiselin, result hi hnawl turin a phut tih a sawi. Vote thlak hun pawhsei chu thil pawm theih loh, a ruahmanna tenawm tak a ni, a ti. Mahse, Thawhṭanni zan khan Liberal Party chuan thuchhuah siamin, President thlanna result chu an pawm thu an sawi a, hemi rual hian inthlan kaihhnawiha thil fel tawk lo awm nia sawite chu thuneituten an ngaihven a, an bawhzui a ṭul thu an tarlang tel a ni.

Flavio Bolsonaro chuan inthlan result puan a nih hnu, Thawhṭanni tlai khan police-te chuan a passport theh lut tura an hriattir thu sawiin, an ram chhuahsan khapsak a ni tih a sawi. US-a awm, a unaupa Eduardo Bolsonaro-a'n inthlanah a unaupa hi a chak loh chuan, an ram chhuahsan se a duh thu a sawi hnuah Supreme Court justice chuan Brazil a chhuahsan khapna thupek hi a siam ta nia sawi a ni. Brazil police-te chuan Flavio Bolsonaro hi a pa, president hlui Jair Bolsonaro chanchin, 'Dark Horse' tih siamna senso a tumsak chungchangah eirukna kaihhnawihah an chhui chiang mek a ni. An ram chhuahsan chu a tum loh thu leh, dik lo taka an puhna te pawh beih let zel a tum thu Flavio Bolsonaro chuan a sawi.