Jordan-ah biak-in beitu mi 3 man

Jordan security force-te chuan nimin khan Karak governorate-a Kristian biak-in beitua puh mi pathum an man. Kar liam ta Zirtawpnia biak-in beihnaah hian mi pariat an thih bakah hliam tuar eng emaw zat an awm a ni.

Public Security Directorate-te chuan pawikhawihtute hi ngawrh taka zawn an nih hnuah, nimin khan Karak-a Al-Jadeeda khuaa in hluihlawn tawh pakhatah an biru man an nih thu a tarlang. Security force-te an hmuh hian a inpe duh lo a, lo bei letin an inkap zui a, an pathum hian hliam tuar vek nia sawi a ni bawk.

Kar liam ta Zirtawpni khan heng mi pathumte hian Hamoud khuaa Greek Orthodox Church-a mitthi vuina inkhawm an hman laiin kalkhawmte chu silaiin an pawng kah a ni. He khua hi Jordan khawpui, Amman chhim thlang lam km 120 vela hlaa awm a ni. Mi pariat an kap hlum a, hliam zinga 27 chu nimin thleng khan damdawi-inah enkawl an la ni.

King Abdullah II chuan pawikhawihtute chu hremna na thei ang ber pek an ni dawn tih sawiin, mitthi chhungte a tawrhpui thu a sawi. An rama venhimna dinhmun pawh ennawn turin thupek a tichhuak nghal bawk.