Brazil President thar atan Lula thlang nawn leh

Brazil ram president thlan thawh hnihna chu Pathianni khan neih a ni a, president ṭanglai Luiz Inacio Lula da Silva chuan Senator Flavio Bolsonaro hnehin thlan tlin a ni. Lula hi President term li a chelhna tur a ni.

President thlan thawh khatna hi October 4 khan neih a ni a, candidate zingah tling tura vote hmuh ngai zat, vote tla aṭanga 50% hmu tling an awm loh avangin vote hmu sang pahnih, Lula leh president hlui, Jair Bolsonaro fapa Flavio Bolsonaro te hian Pathianni khan inthlan thawh hnihna an hmachhawn leh a ni. Inthlan thawh hnihnah hian kum 80 mi, Lula chuan vote 52% a hmu.

Lula hian vote mtd 64 a hmu a, a khingpui Bolsonaro aiin vote mtd 4.4 velin a hmku tam zawk a, Brazil President thlanna neih tawha vote hmu tam ber a ni. Kum 2022 inthlanah khan vote mtd 60 a lo hmu tawh bawk.

President atana thlan tlin a nih thu puan a nih hnuah Lula chuan Brazil mipuite hnenah lawmthu hrilhin, democracy humhim leh tundin zel a nih theihna tura theihtawp chhuahtu ṭhalaite, an ram hmalam hun venhimna tura vote thlaktu zawng zawngte chungah a lawm hle a, beiseina thar siamsaktu an ni tih a sawi. A hnehna chan chu an ram mipui hnehna a ni, tiin a sawi bawk.

Hetih lai hian a khingpui, Flavio Bolsonaro chuan a chak loh a la pawm duh lo a, inthlan result chu a hnawl tura phutin, thil theih a ni lo tih a sawi. Vote thlak hun pawhsei a ni chu a sawisel bawk a ni. Pathiannia vote thlak a nih kha, vote thlak theih hun tura bithliah chu darkar hnihin pawhsei a ni. Brazil Supreme Court justice Cristiano Zanin chuan hei hi candidate pahnihte ngenna avanga tih a nih thu a sawi.